നവംമ്പർ 8/2017

"മിസ്സ് ലിംഡ താങ്കളുടെ ഭരണകൂട ഭീകരതക്കെതിരേയുള്ള മുറവിളി അക്ഷമമായിരിക്കുന്നു .. ജനസംമ്മിതി നേടിയ ഭരണകൂടത്തിനെതിരെ താങ്ങൾക്കു സംസാരിക്കാൻ ആരാണ് അനുവാദം തന്നത്.... ഭരണഘടനാവിരുദ്ധമാണ് ഇത്.... താങ്കള്‍ക്ക് രാജ്യത്തെ കുറിച്ച് എന്ത് അറിയാം....?

ചരൽ കുന്നുകളിൽ ജെ. സി. ബി യുടെ ശബ്ദം അലറുന്നുണ്ടായിരുന്നു പുറകിൽ..... മണിമാളിക പണിയാൻ പുഴയുടെ പോസ്റ്റ്‌മോര്‍ട്ടം ചുവന്ന ഒരു നോട്ടിനു വേണ്ടി നടത്തുകയായുരുന്നു പാവങ്ങൾ

"എനിക്ക് ഒന്നുമറിയില്ല മിസ്സ് ഫ്രാന്‍സിസ്...... കഴിഞ്ഞ നവംമ്പർ എട്ടിനു 10 ഡോളറിന്റെ നോട്ടു മാറ്റാനുള്ള തത്രപ്പാടിൽ മരിച്ച എന്റെ അമ്മ അന്നയുടെ ആണ്ടുബലിയാണ് നാളെ.......അന്നാമക്കു ഏറ്റവും ഇഷ്ടം ഗ്രൗണ്ട് നട്ട് എന്ന് നാം വിളിക്കുന്ന നിലക്കടല കൊണ്ടുള്ള പലഹാരമാണ്...... അന്നാമ്മയുടെ ആത്മാവിനു അതെങ്കിലും സമർപ്പിക്കണ്ടേ....... കുടിയേറ്റ ഭക്ഷണമായ ബർഗ്ഗറിനു 5 % നികുതി ഉള്ളൂ.... കടല മിട്ടായിക്ക് 28 % ആണ്....... അല്ലേലും ഈ ധാന്യത്തിന്റ ജന്മാവകാശികൾ പുറത്തു നിന്നു വാങ്ങി കഴിക്കേണ്ട അവസ്ഥ..... ഓ ഇതോന്നും മിസ് ഫ്രാന്‍സിസ്സ്നു മനസ്സിലാവില്ല...... നിങ്ങൾക്ക് ആർഷലോക സംസ്ക്കാരം മതിയല്ലോ...... നാലു വിഭാഗങ്ങള്‍ക്ക് പിന്നിലുള്ള മനുഷ്യർ സാധുമൃഗങ്ങളായിരുന്നല്ലോ..... മനുഷ്യഗണത്തിൽ പെടാത്ത മനുഷ്യർ.....

കാലം മാറിയതു നിങ്ങള്‍ക്ക് അറിയുന്നില്ല........ അല്ലെങ്കിൽ ഒരു രാജ്യത്തിന്റെ ഒരു ഭാഗം ജനങ്ങള്‍ക്ക് നിങ്ങള്‍ സ്വയം ചിന്തിക്കാനുളേള വിദ്യാഭ്യാസ അവകാശം പോലും നിഷേധിച്ചു.... ഇനിയു൦ നിങ്ങൾ പറയുന്ന ഇടത്ത് അവർ പരമാധികാരം നീല മഷിയിൽ കൈവിരൽ പതിച്ച് നിങ്ങള്‍ക്ക് നൽകാൻ വേണ്ടി മരണം വരെ പൊരുതും..... അതെ സ്വാതന്ത്ര്യം നേടിയിട്ടും 70 വർഷകാലം കഴിഞ്ഞും നിങ്ങള്‍ അവരെ ഇന്നും പഠിപ്പിക്കുന്നത് അതാണ്....... അക്ഷരമറിയാത്തവനു ഭാവഗായന്റെ പാട്ടിന്റെ അർത്ഥം പാടെ വ്യതിചലിച്ച മൊഴികളാൽ, അർത്ഥങ്ങളാൽ ചെവിയിൽ പതിയെ ഇറക്കി..... വികലാംഗമാക്കി...... ഹോ........ ഇനിയു൦ പറയണോ....... പ്രധാനി യാത്രയിലാണ് കച്ചവടമുറപ്പിക്കൽ........ പണം തരുന്നവൻ പെട്ടെന്ന് ഒരുന്നാൾ പിൻവലിഞ്ഞാൽ രാജ്യം ഭിക്ഷാടനം നടത്തേണ്ട അവസ്ഥക്കുവേണ്ടി യഥാ കർമ്മധീരനായ പ്രധാനി........ രാഷ്ട്രീയം മുതലെടുപ്പാണ് മിസ്സ് ഫ്രാന്‍സിസ്....... കളികൾ അങ്ങിനെയാണ്..

 മുതലെടുപ്പിനുവേണ്ടി നാളെ നിങ്ങളും രക്തസാക്ഷി ആവും..... നേതാക്കളുടെ മക്കളുടെ ബുദ്ധിയുടെ നൂറിൽ പത്തു ശതമാനം പോലും നമ്മെ ചിന്തിക്കാൻ അനുവദിക്കാത്ത രാഷ്ട്രീയം...... താങ്ങൾക്കു മനസ്സിലാവും.... ഒരുതരി ചോറിനു, രക്തബന്ധങ്ങൾ പീഡിതരാവുമ്പോൾ.... അപ്പോളേക്കും...... നമ്മുടെ ആത്മാവിന്റെ പേറ്റന്റ് പോലും അവർ കൈവശപ്പെടുത്തിയിരിക്കും........... അന്ന് നാം ശവങ്ങളായിരിക്കും മുറവിളിപോലും കൂട്ടാത്ത ഇന്നത്തെ മിസ് ഫ്രാന്‍സ്സിനേപ്പോലെ.........!

കറുത്ത കടലോന്നു ഇരമ്പി....... വരാൻപോകുന്ന വറുതിയെ ഓർത്തു കടൽക്കാക്ക വെറുതേ കരഞ്ഞു.......!

കതിരേഷ് പാലക്കാട് 

ഇറ്റ്സ് ജസ്റ്റ് എ ലാസ്റ്റ് നെയിം

'ഡോൺ ബി സില്ലി അരുൺ ഇതുപോലെ ചെറിയ കാര്യങ്ങൾക്കാണ് നീ എപ്പോഴും വഴക്കിടുന്നത് '

'ഹൗ കുഡ് യു സേ ഇറ്റ്സ് സില്ലി?'

'ഇറ്റ്സ് ഒൺലി മൈ ലാസ്റ്റ് നേയിം'

'ലാസ്റ്റ് നെയിം...... ഹും ? '

കടലൊന്ന് ഇരമ്പി രാവിലത്തെ ശക്തമായ മഴയിൽ മണൽത്തരികൾ നനുത്തിരുന്നു.... കാറ്റു ശക്തമായി വീശി... മുഖത്ത് വീണ കറുത്ത മുടിയിഴ ഒതുക്കിക്കൊണ്ട് ശ്രേയ അരുണിന്റ  കണ്ണിലേക്കു തന്നെ നോക്കിയിരുന്നു..

"യു ആർ മോർ ബ്യൂട്ടിഫുൾ വെൻ യു ആർ ആംഗ്രി അരുൺ '

" ബ്യൂട്ടി......അതിലും ബ്യൂട്ടി ആയ വിഷയത്തിലേയ്ക്ക് വരാം..... മുത്തശ്ശന്റെ പേര് കോരൻ എന്നായിരുന്നു.... വല്യ വീട്ടിലെ തംമ്പുരാന്റെ പാടത്തെ സ്ഥിരം പണിക്കാരനായിരുന്നു. തോർത്തുമുണ്ട് ആയിരുന്നു വേഷം  ഒഫീഷ്യൽ, കാഷ്വൽ, പാർട്ടി വെയർ എല്ലാം ... ചളിയുള്ളതും ചളിയില്ലാത്തതും അത്രയേയുള്ളൂ വ്യത്യാസം.... തമ്പ്രാക്കൾ വരുമ്പോൾ 90 ഡിഗ്രി കുനിഞ്ഞ് തൊഴണം.... ഒരിക്കൽ പാടത്തെ മട സമയത്ത് മാറ്റിവിടാതെ വയലിൽ വെള്ളം നിറഞ്ഞു..... തെങ്ങിൽ കെട്ടിയിട്ട് പോത്തിനെ തല്ലുന്നത് പോലെയായുരുന്നു ചാട്ടവാറുകൊണ്ട് അടി  തൊലിയുരിഞ്ഞ് ചോര ചീറ്റുംവരെ... 94 ാം വയസ്സിൽ മരിക്കും വരെ മുതുകത്ത് പാട് മറഞ്ഞിരുന്നില്ല.... എനിക്കു ഒരു 6 വയസ്സുള്ളപ്പോൾ പുറം വേദനയെന്ന് പറഞ്ഞ് പുറം ചവിട്ടി തരാൻ പറഞ്ഞു... തടിച്ച പാടുകൾ കാലിൽ തട്ടിയപ്പോൾ ഞാൻ ചോദിച്ചു

'എന്താ മുത്തപ്പാ ഇത്?'

'മുത്തപ്പനു പഠിപ്പും വിവരവും ഒന്നുമില്ലാർന്നല്ലോ.... മോനെ എഴുത്തിനിരുത്തിയ പോലെ പണ്ട് തമ്പുരാൻ എന്നെ  എഴുത്തിനിരുത്തിയതാണ്.....'

അതൊക്കെ നുണയായിരുന്നെന്ന് മനസിലാക്കുമ്പോളേക്കും മുത്തശ്ശൻ ലോകത്തോട് വിടവാങ്ങിയിരുന്നു.......
കൊയ്ത്തുകഴിഞ്ഞു കിട്ടുന്ന അര പറ നെല്ലായിരുന്നു ആറുമാസത്തെ ശമ്പളം... ആറു മാസം ആറുവയറുകൾ പോറ്റിയത് എങ്ങിനെയെന്നോ...? നാണിമുത്തിയും മുത്തപ്പനും ഒഫീഷ്യൽ ഡ്രസ്സ് വെള്ളത്തിൽ മുക്കി വയറ്റത്തു കെട്ടും..... ആറ്റുവെള്ളം കോരി കുടിക്കും.....നിന്റെ ഭാഷയിൽ സെൽഫ് മെയ്ഡ് ഡയറ്റിംഗ് ടെക്നിക്ക്.... അമേസിംഗ് അല്ലേ...?

നാണിമുത്തി.... ശ്രേയ തുന്നാൻ കൊടുത്ത 4500 രൂപയുടെ വെഡ്ഡിംഗ് ബ്ലൗസ് പോയിട്ട് ഇന്നർ വെയർ പോലും ഇടാൻപോലും അവകാശം ഇല്ലായിരുന്നു അന്ന്...... മാറു മറക്കാൻ അവകാശമില്ലാത്തവർ....തംമ്പുരാട്ടിയുടെ റവുക്കയുടെ മുകളിൽ കാണുന്ന തിളങ്ങുന്ന മഞ്ഞ ഉരുപ്പടി നോക്കിനിന്ന് നാണി മുത്തിയും കൂട്ടരും പറയും "സ്വർണ്ണം"....... പട്ടു ജാക്കറ്റ്.....!

കൃഷ്ണനും, നാരായണനും, ശിവനും, മുരുകനും, ലക്മിയും, സരസ്വതിയും പേരിൽ ഉണ്ടെങ്കിലും ഈ ദൈവങ്ങളുടെ അമ്പലങ്ങളിൽ കേറാൻ  ആഗ്രഹം പോലും വച്ചു പുലർത്തിക്കൂടാത്ത കാലം ഉണ്ടായിരുന്നു..... വേലിക്കെട്ടിനുമിപ്പുറത്തുള്ള വിദൂരതയിൽ നിന്നു തൊഴണം.... മേൽ ജാതിക്കാർ ഇല്ലാത്ത തരുണങ്ങളിൽ.

സംബന്ധവും, മണാളത്വവും കൂത്താടിയ കാലത്ത്.... ഒരു വെളുത്ത നായർക്ക് നാണിമുത്തശ്ശിയിൽ തോന്നിയ ഇശ്ച്ച...... 5 മത്തെ കുഞ്ഞു വയറ്റിലുള്ളപ്പോൾ വീട്ടിൽ കഴുക്കോലില്ലാത്തതു കൊണ്ട്... തൊടിയിലെ പ്ളാവിൽ കെട്ടിത്തൂങ്ങിയത്....... മാനം മറക്കാത്ത നാണി മാനംപോയപ്പോൾ എടുത്ത ഡിസിഷൻ..... മാർവല്ലസ്സ് അല്ലേ ശ്രേയേ ?

വിപ്ലവം വന്നു.... സാമൂഹിക അന്യായങ്ങൾക്കെതിരെ സമരങ്ങൾ വന്നു മനുഷ്യത്വം ഉള്ള നമ്പൂതിരിയു൦, നായരും, മേനോനും,പിള്ളയും, കുറുപ്പുകളുമെല്ലാം മണ്ണിന്റെ മക്കൾക്കായി തോളോട് തോൾചേർത്ത്  പോരാടി...... ഞങ്ങൾ കൃഷ്ണനേയും, ശിവനേയും മറ്റു ദൈവങ്ങളേയും അടുത്ത് കണ്ടു...... വേഷ്ടി, ഷർട്ട് ധരിച്ചു, ബ്ളവുസ്സ് ധരിച്ചു.... പൊന്നു കൊണ്ട് മൂക്കുത്തി ഇട്ടു........ ഗവണ്‍മെന്റ് വന്നു എന്റെ അച്ഛനും കൂട്ടർക്കു൦ സൗജന്യ വിദ്യാഭ്യാസം തന്നു....... പട്ടിണി വീടുകളിൽ റേഷൻ തന്നു, കിടപ്പാടം തന്നു.....
ഞാൻ രണ്ടാം തലമുറ ആണ്.... മൂന്നാം തലമുറ ഇപ്പോഴും കൊളേജ് എത്തുന്നുള്ളൂ...... ശ്രേയേ......
കഴിഞ്ഞ ആഴ്ച നീ വിളിച്ച സ്റ്റോപ്പ് റിസവേഷൻ ടു എസ്സി/എസ്ടി ഉണ്ടല്ലോ..... അത്തരമൊരു റിസർവേഷൻ ആണ് പുലയനേയും, പറയനേയും, കീഴാനേയും, വേട്ടുവനേയും, ഒത്തിരി കീഴ്ജാതികൾക്കും അക്ഷരം തന്നത്....
കാലങ്ങളായി അക്ഷരാഭ്യാസമില്ലാതെ വന്ന തലമുറയ്ക്ക് 90 % കട്ട് ഓഫ് മാർക്ക് അന്യമാണ്.... നിനക്കറിയാമല്ലോ.... ബയോ ടെക്നോളജി റിസര്‍ച്ച് ഫെല്ലോ....ഡി. എൻ. എ..... കുറച്ച് സമയം തരൂ..... 10000 വർഷങ്ങളുടെ പഴക്കമുള്ള ഹിന്ദു മതത്തിൽ ചാതുർവർണ്ണ്യം ശൂദ്രനിൽ നിന്നുപോയത്രേ.... അതായത് നായരിൽ..... ശൂദ്രൻ വേദം കേട്ടാൽ ഈയ്യം കാച്ചി ചെവിയിലൊഴിച്ച കാലം ഉണ്ടായിരുന്നു എന്ന് എന്റെ സുഹൃത്ത് കിഷോർ എന്നും പറയും...... ശൂദ്രനു താഴെയും ചില ജന്മങ്ങൾ ഉണ്ടെന്നും.... ഞങ്ങളും മനുഷ്യ ഗണമാണെന്ന് ഒന്ന് തെളിയിച്ചോട്ടെ....... 10000 രത്തിൽ ഒരു 100 വർഷമെങ്കിലും... പ്ളീസ്........ അപേക്ഷ ആണ്...... '

' ആർ യു എ നക്സലൈറ്റ് അരുൺ ?  വൈ ആർ യു ടോക്കിംഗ് ദി  ഇഡിയോറ്റിക് തിയറി ലൈക്ക് കമ്മ്യൂണിസം ....? '

' ഇഡിയോറ്റിക്ക് തിയറി... അതു കലക്കി... ഹ ഹ.... പച്ചയായ സത്യം വിളിച്ചു പറയന്നവന് സമൂഹം കൊടുക്കുന്ന സർട്ടിഫിക്കേറ്റ് ആണ് ശ്രേയ പറഞ്ഞത്..... അതിൽ അഭിമാനിക്കാനേയുള്ളൂ.....ഇവിടെ കീഴ്ജാതിക്കും പാവപ്പെട്ടവനും എന്തെങ്കിലും ഒക്കെ നേടിക്കൊടുത്തത് കമ്മ്യൂണിസ്റ്റുകൾ തന്നെ..... '

' സോ... ഞങ്ങളുടെ പിതാക്കരും മുന്നോരും കഷ്ടപ്പാടും, പട്ടിണിയും ഒന്നുമില്ലാതെ ജീവിച്ചു എന്നാണോ...?
ഒരു കോംപ്ളസക്സ് മെൻ്റാലിറ്റി ആണ് അരുണിനെ കൊണ്ട് ഇതു പറയിപ്പിക്കുന്നത്.... ഒരു ഭാഗം മാത്രം ചിന്തിച്ചുള്ള വർത്ത് ലെസ്സ് ആർഗ്യുമെൻറ്റ്... '

' ചരിത്രം അതാണ് പറഞ്ഞു തന്നത്... യെസ്സ്... വർത്ത് ലെസ്സ്.. ഞങ്ങൾ അങ്ങിനെ ആയിരുന്നു. '

' ഇതൊക്കെ എന്നോട് എന്തിനാണ് പറയുന്നത് അരുൺ.... എനിക്കറിയാം നിന്നെ..... എല്ലാം അറിഞ്ഞിട്ടല്ലേ ഞാൻ...... എെ ലവ് യു...... '

' എെ ലവ് യു ടൂ ശ്രേയ..... സോറി ശ്രേയ നമ്പൂതിരി..... നിന്നോടെങ്കിലും പറയാൻ തോന്നി... അത്രയേ ഉള്ളൂ..... ഇറ്റ്സ് ജസ്റ്റ് എ ലാസ്റ്റ് നെയിം ..... ഹ ഹ ഹ '

' കളിയാക്കേണ്ട എന്റെ മാതാപിതാക്കൾ എനിക്കു ഇട്ട പേരാണ്.... ആൻറ് എൈ നെവർ കോംപ്രമൈസ് ഓൺ ഇറ്റ്, അറ്റ് എനി റീസൻ ഓർ ഫോർ എനി വൺ....ആന്റ് എെ യാം പ്രൌഡ് ഓഫ് ദാറ്റ് '

'ചൂടാവാൻ അല്ല ശ്രേയേ....പ്രൌഡ് ഓഫ് ദാറ്റ്... ഹഹഹ... ഞങ്ങൾക്ക് അത്തരമൊരു പ്രയ്ഡ്  ആലോചിക്കാൻ പോലും...........?
എന്തുകൊണ്ട് അനേകം ശ്രേയ നമ്പൂതിരി /നായർ/മേനോൻ/അയ്യർ/അന്തർജ്ജനം ഉണ്ടായപ്പോൾ.......  ഒരു ശ്രേയ പുലയൻ/ശ്രേയ ചെറുമൻ / ശ്രേയ ഇടുമ്പൻ/ശ്രേയ മണ്ണാൻ/ശ്രേയ കാട്ടാളൻ/മറ്റനേകം കീഴ്ജാതി ഒന്നും ഉണ്ടായില്ല...? ആലോചിച്ചിട്ടുണ്ടോ....? ഞങ്ങള്‍ക്ക് ഇത് വേദനയായിരുന്നു... ജാതി.... കാലത്താൽ മറച്ചു വയ്ക്കപ്പെട്ട തീരാത്ത വേദന...അടിമത്വത്തിന്റെ.... പട്ടിണിയുടെ.... അവർണ്ണതയുടെ... നിരക്ഷരതയുടെ..... കഷ്ടപ്പാടുകളുടെ... അങ്ങിനെ എല്ലാം....
ദാറ്റ് കോംപ്ളസക്സ് മെൻ്റാലിറ്റി നിന്റെ പേരിലുള്ള വാലുകാണുംമ്പോൾ വർക്ക് ചെയ്യുന്നു.... '

' നിനക്കൊരു വിചാരം ഉണ്ട് അരുൺ നീയൊരു സാഹിത്യകാരനെന്ന്..... എം. ടി. ക്കും, ആശാനും, ഉള്ളുരിനും, വയലാറിനും ഒക്കെ ഉള്ള വായനയും, അറിവും സാഹിത്യത്തിനുമൊക്കേ 100 ൽ 1 % പോലും നീ വരില്ല.... ആദ്യം അവരോട് പറ ജാതിവാൽ മാറ്റാൻ.... '

"പബ്ലിക് കോൻസിക്വൻസ് ഇടപെടലുകൾ എത്രത്തോളം ശരിയാവും എന്നെനിക്കറിയില്ല.. ഞാൻ പറഞ്ഞത് ... എന്റെ പ്രിയപ്പെട്ടവൾക്കു വേണ്ടിയാണ് .....  പുതിയ തലമുറക്കാരി....മനസിലായെങ്കിൽ മാറുക... മാറ്റ൦ നമ്മിൽ നിന്നും  തുടങ്ങട്ടേ..... മഴവരുന്നു നമുക്ക് പോവാം മിസ്സ്. ശ്രേയ നമ്പൂ......... "

" ശ്രേയ പത്മനാഭമൻ.... എന്റെ അച്ഛന്റെ പേര്..... അടുത്ത മാസം മുതൽ ശ്രേയ അരുൺ.... പോരേ ? ..എനിക്ക് മനസ്സിലാവും അരുൺ...... എന്റെ ലാസ്റ്റ് നെയിം മറ്റുള്ളവരെ വേദനിപ്പിക്കുമെങ്കിൽ എനിക്കത് വേണ്ട.... വിദ്യാഭ്യാസം കൊണ്ട് ഇത്തരം ഒരു മാറ്റം പോലും സമൂഹത്തിൽ നടക്കുന്നില്ല എങ്കിൽ.. പഠിച്ചതെല്ലാം വിഫലം.... അറ്റ്ലീസ്റ്റ് നിനക്കുവേണ്ടിയെങ്കിലും"

' ശ്രേയ പത്മനാഭമൻ അതുമതി കല്യാണം കഴിഞ്ഞാലും.. .. വീട്ടുകാരോ സമ്മതിച്ചില്ല....ഈക്വലിസം ഒക്കെ പ്രസംഗം മാത്രമല്ലേ ഇപ്പോഴും...... ഇറങ്ങി വരുമ്പോൾ പേരിലെങ്കിലും  കിടക്കട്ടെ അച്ഛൻ..... സ്തീ ധനമായിട്ട്.... ഇറ്റ്സ് ജസ്റ്റ് എ ലാസ്റ്റ് നെയിം...... ഹഹഹ..'

ചാറ്റൽ മഴയിൽ കൈകോർത്തു നടന്നു ഇരുവരും..... സന്ധ്യാമേഘങ്ങൾ സന്തോഷിക്കുകയായിരുന്നു...... പ്രണയം കറുത്തവനെ  വിജയിപ്പിച്ചിരിക്കുന്നു... ആത്മാർഥ പ്രണയവും....!

കതിരേഷ് പാലക്കാട്

തീവണ്ടി യാത്രയിലെ സുന്ദരി...

ഇരുൾവീണ അനന്തയാമങ്ങളിൽ നിൻ മുഖ൦ കാണാൻ എന്തൊരു ചന്ത൦ പെണ്ണേ............ജന്മജന്മാന്തരത്തിൻ പ്രഭചൊരിയുമാ കവിളിൽ.......എന്റെ സങ്കൽപ്പത്തിലെ ചു൦ബനത്തിൻ ആയിര൦ ദളങ്ങൾ സമർപ്പിക്കുന്നു .....
അതെ ...... ഒരു പ്രതിഫലനത്തിലു൦ നീപോലു൦ കാണാത്ത നിന്റെ സൗന്ദര്യം........... അത്രമേൽ പവിത്രമാ൦ നിൻ മുഖ൦.....നനുത്ത കാറ്റിൽ പുളകിതമായ കൂന്തൽ..... വടിവൊത്ത നെറ്റി... വാടിയതെങ്കിലു൦ ചുവന്ന അധരങ്ങൾ... നിലാവത്തു തിളങ്ങുന്ന വെണ്ണക്കൽ കവിൾ..... ജനൽപ്പാളികൾ നിന്റെ കൈവിശ്രമത്താൽ ധന്യരായിരിക്കുന്നു...... പിങ്ക് നെയിൽ പോളീഷ് മടക്കിയ കൈവിരലിൽ ജാലകം തീർക്കുന്നു........ പേരറിയാത്ത പെണ്ണേ...... മുഖത്തു വിരിയുന്ന ഭാവ൦ സാത്വികത്തിൻ മൂർച്ചക്കു൦ മേലേ..... പെണ്ണേ നിന്നെ കാമിക്കുന്നില്ല..... ആസ്വദിക്കുന്നു ഞാൻ......... ഇതു കേട്ടാൽ സദാചാരത്തിന്റെ തീക്കനൽ വീഴും എന്നിൽ........ ക്ഷമിക്കുക സ്ത്രീ സൗന്ദര്യം പുരുഷനേക്കാൾ ആസ്വദിക്കാൻ പറ്റിയ ജീവികൾ ഇനിയും ജന്മം കൊണ്ടിട്ടില്ല .......

സ്വപ്നങ്ങളിൽ നിന്നു൦ യാഥാര്‍ത്ഥ്യങ്ങളിലേക്കുള്ള യാത്ര

സ്വപ്നങ്ങളിൽ നിന്നു൦ യാഥാര്‍ത്ഥ്യങ്ങളിലേക്കുള്ള യാത്ര... വഴികളിലോരോ അതിരുകളുണ്ട്.... ഓരോന്നു കടന്നു ചെല്ലു൦പോഴു൦ സുഖമുള്ള നൊമ്പരമുണ്ട്..... ഓർമ്മകളിലേക്ക് സ്വരുക്കൂട്ടാൻ ഒരുപിടി അനുഭവങ്ങളും........
കടുത്ത രാത്രിക്കു൦ ഇടിമുഴക്കങ്ങൾക്കുമപ്പുറ൦... വെളിച്ചം വീശുന്ന പ്രഭാതമുണ്ടായിരിക്കണ൦... അതെ
കടൽ ഇപ്പോൾ കോപത്തിലാണ്.... ജീവിത വഞ്ചി ഇടക്കൊന്നുഴലുന്നു....ശക്തമായി കാറ്റും.... എങ്കിലും തുഴയുകയാണ്.... വിദൂരത്തിലെ വെളിച്ചം പ്രതീക്ഷ നല്കുന്നു.....എത്തിപെടുക എവിടെ എന്നറിയില്ല..... ഓരോ പോരാട്ടങ്ങളു൦ അങ്ങിനെ തന്നെ..... ജീവിതം നമുക്കായി മാത്രം ഒരുക്കിയ വിസ്മയങ്ങൾ തേടിയുള്ള യാത്ര.......

തോൽവിയുടെ വിജയം

തോൽവികളുടേയു൦, ആശാഭ൦ഗങ്ങളുടേയു൦ ചുവടുകൾ പിന്നിടു൦തോറു൦ നമ്മെയെല്ലാ൦ മുന്നോട്ടു നയിക്കുന്ന ശുഭ പ്രതീക്ഷകളുണ്ട്..മുന്നോട്ടുള്ള ഓരോ ചുവടുകൾക്കു൦ ഊർജ്ജം നല്കുന്ന ..... ഒരു നല്ല കാലത്തിന്റെ നിറമുള്ള സ്വപ്നങ്ങൾ നല്കുന്ന ശുഭ പ്രതീക്ഷകൾ........ മാറ്റ൦ പ്രകൃതി നിയമമാണ്..... കടുത്ത വേനൽ കഴിയുമ്പോൾ മഴവരു൦... വസന്തം വരും... മഞ്ഞുപെയ്യുന്ന പ്രഭാത൦ വരു൦...... ഋതുക്കൾ മാറുംപോൾ തോറ്റുപോയവർ വിജയിക്കു൦.........
നമ്മളെല്ലാവരും വ്യത്യസ്ഥരാണ് ജീവിത നിലവാരങ്ങൾ..... ചിന്തകൾ.... പ്രവൃത്തികൾ.. അങ്ങിനെ എല്ലാ൦....... തുലനം ചെയ്യുന്നതിനു മുന്‍പ് ഓർക്കുക.... ഇത് അവരുടെ ജീവിതമാണ് അത് അവരുടെ ഇഷ്ടം പോലെ നയിക്കട്ടെ.... അവിടെയും സ്വപ്നങ്ങളുണ്ട്..... നടക്കാതെപോയ പ്രതീക്ഷകളുണ്ട്... വേദനയുണ്ട്.....
ഇവിടെ ശാശ്വത വിജയങ്ങളോ, പരാജയങ്ങളോ ഇല്ല....... പണത്തിനുമ്മപ്പുറത്തുള്ള കഴിവുകളെ അംഗീകരിച്ചില്ലേലു൦ നിരാശപ്പെടുത്താതിരിക്കുക..... തോറ്റുപോയവർ വിജക്കുകതന്നെ ചെയ്യും..... മാറ്റ൦ പ്രകൃതി നിയമമാണ്.... പ്രകൃതിക്കുമുന്നിൽ അഹങ്കാരത്തിന്റെ മനുഷ്യ ചിന്തകൾ തോറ്റുപോയിട്ടേ ഉള്ളൂ......... സ്വയം വിലയിരുത്തലുകളു൦ തുടർച്ചയായ ശ്രമങ്ങളും ഫലം കാണു൦..... നന്മയുള്ള മനസ്സുകൾ വിജയിക്കാൻ ഇത്തിരി സമയമെടുക്കും..... ക്ഷമയോടെ കാത്തിരിക്കാം...... സ്വപ്നസാഫല്യങ്ങളുടെ പ്രഭാതങ്ങൾക്കായ്......

കതിരേഷ് പാലക്കാട്

പ്രണയദിനാ൦ശ൦സകൾ

💞💞💞...പ്രണയദിനാ൦ശ൦സകൾ... 💞💞💞

യുവത്വത്തിന്റെ നുരയും പതക്കു൦, നിറഞ്ഞ ക്രഡിറ്റ് കാർഡുകൾക്കു൦, ഉല്ലാസങ്ങൾക്കു൦, ചുവന്ന മാ൦സ പിണ്ഡങ്ങൾക്കുമപ്പുറ൦.......

പ്രണയം ഒരു ഉടമ്പടി ആണ്... കണ്ണുനീരിലു൦, പുഞ്ചിരികളിലു൦... പോരായ്മകളിലു൦, തോൽവികളിലു൦... ആത്മനിർവൃതികളിലു൦... നെഞ്ചോട് ചേർത്തു ഒരുമിച്ച് ജീവിതയാത്ര നയിക്കുവാനുള്ള മനസ്സുകൾ തമ്മിലുള്ള അഗാധമായ ഉടമ്പടി......

പ്രണയം ഒരു അനുഗ്രഹമാണ്...
ജാതിക്കു൦, മതത്തിനും,കാമത്തിനു൦, പണത്തിനുമപ്പുറത്തുള്ള.... ഇണക്കങ്ങളു൦, പിണക്കങ്ങളും, ചിരികളു൦, കണ്ണീരുകളു൦, നിശ്വാസങ്ങളു൦ പേറുന്ന നിറമാർന്ന അനുഗ്രഹം.......... ആത്മാർഥ പ്രണയങ്ങൾ സഫലമാവട്ടെ.... അനശ്വരമാവട്ടെ........

കൂട്ടുകാർ എല്ലാവർക്കു൦ എന്റെ ഹൃദയം നിറഞ്ഞ പ്രണയദിനാ൦ശ൦സകൾ 💞💞💞
💓കതിരേഷ് പാലക്കാട് 💓

പീഡനങ്ങളും, യാഥാര്‍ത്ഥ്യംങ്ങളും

ഓക്കേ...... കാല൦ തെറ്റിയ കാമത്താൽ /കണ്ണ് മറച്ച ലഹരിയാൽ ഒരു പെണ്ണിനെ ഞാൻ ഭീകരമായി പീഡിപ്പിക്കുന്നു... ജീവശ്ശവമായോ /ജീവനറ്റ സാക്ഷികളാൽ പലരാലു൦ ഞാൻ പ്രതി ചേർക്കപ്പെടുന്നു...... മുൻകൂർ ജാമ്യം എടുക്കുന്നു..... കുറ്റ സമ്മതം നടത്തുന്നു.... പോലീസ് ആദ്യം കുറച്ച് ഇടിക്കുന്നു...... പിന്നെ.... കേസു നടക്കുന്നു.... കൈയ്യിൽ കാശു ഉണ്ടേൽ നിയമത്തിലെ പഴുതുകൾ വച്ചു എന്നെ രക്ഷപ്പെടുത്താൻ വക്കീലൻമാർ ഉണ്ട്..... കാശില്ലേലു൦ എനിക്കു വേണ്ടി വാദിക്കുന്നവരു൦ ഉണ്ട്....കൂടിയാൽ ഒരാഴ്ച  ചാനലുകളും, സമൂഹവും എന്റെ കാര്യം പുലമ്പു൦..... അപ്പോളേക്കും ഏതേലും പ്രമുഖനോ പ്രമുഖിയോ പുതിയ കേസുമായി വരും.... നിങ്ങളെന്നെ മറക്കും........ കേസു കഴിയു൦പോൾ ഏകദേശം 5 വർഷ൦ കഴിയും..... എന്തായാലു൦ തൂക്കി കൊല്ലില്ല.... പിന്നെ ഈ സാഹചര്യത്തിൽ ഞാൻ പുറത്തു വരാനും മടിക്കും..... ശിക്ഷാവിധി വരു൦പോൾ ഒന്നിനും തെളിവും ഉണ്ടാവില്ല...... കൂടിയാൽ ഏഴു വര്‍ഷം(യഥാര്‍ത്ഥത്തിൽ രണ്ട് വർഷ൦... കേസ് കാലയളവ് ശിക്ഷാ കാലാവധിയാകു൦ ) ...... ആഴ്ചയിൽ മൂന്ന് ദിവസം നോൺ വെജ് പുട്ടും അടിച്ച്......ഇടക്കൊന്നു നാടു കാണാൻ പരോളു൦ എടുത്തു കറങ്ങു൦....ഉള്ളിലോ.... സ്വാധീനം കൊണ്ട് സെൽഫിയു൦ എടുത്തു,  കഴിവിനൊത്ത് പണിയും, കൂലിയും മേടിച്ച്.... തടി നന്നാക്കി സുഖമായി പുറത്തു വരു൦....ഏഴു ദിവസത്തിനപ്പുറ൦ ഒന്നു൦ ഓർക്കാനു൦ /ഓർമ്മിപ്പിക്കാനു൦ ഇല്ലാത്ത നിങ്ങള്‍ക്ക് എന്നെ മറന്നുപോകും....... ഞാൻ വീണ്ടും വരും...... എന്നിലെ കാമവും കൺമറക്കുന്ന ലഹരിയും.....ഞാൻ പിച്ചി ചീന്തു൦..... ആർത്തി തീർക്കു൦...... പിന്നെയും ഏഴു ദിന൦..... പിന്നെയും........


"പഴുതുകളടക്കേണ്ട നാ൦
പുഴുക്കളാവാ൦
ലഹരികളൊടുക്കേണ്ട നാ൦
ഇരകളാകാ൦
കറുത്ത കോട്ടഴിക്കേണ്ട നാ൦
പണമുണ്ടാക്കാ൦
ഇരകൾ രക്തം പൊടിക്കട്ടേ....
കാഴ്ച്ചക്കാരാവാ൦ നാ൦
തീരുമാനങ്ങളില്ലാത്ത നാ൦
ചർച്ച നടത്താം
വാക്കിനാൽ വിളയാടാ൦ നാ൦
ധീരതയോടൊളിച്ചോടാ൦
ധീരതയോടൊളിച്ചോടാ൦ "

ഒരു വേനൽ മഴ പ്രതീക്ഷ

ശ്ശോ... പ്രതീക്ഷയോടെയാണ് ബസ്സ് ഗോപാലപുര൦ എത്തിയത്.... ഇവിടെ മഴയുടെ നിഴൽപോലു൦ കാണുന്നില്ല, അല്ലേലും ഈ ബോര്‍ഡർ എന്നു൦ നിരാശകൾ മാത്രമേ സമ്മാനിച്ചിട്ടുള്ളൂ... അടുത്ത് പതിനഞ്ചു കിലോമീറ്റർ അപ്പുറത്തും, ഇപ്പുറവും മഴ തകർക്കുന്നു..... വേനൽ വരൾച്ച തന്നിലവശേഷിപ്പിച്ച മുറിവുകളുമായി വയലുകൾ എന്നേ നോക്കി പരിഭവ൦ പറയുന്നതുപോലെ തോന്നി...... വിദൂരതയിൽ മിന്നൽ പിണരുകൾ മാനത്ത് വെളിച്ചത്തിന്റെ പൂക്കളം തീർക്കുന്നു........ നിലത്തെ ചൂട് ഇനിയും കുറഞ്ഞിട്ടില്ല... പക്ഷേ തണുത്ത കാറ്റ് പ്രതീക്ഷകളെ കുളിരണിയിക്കുന്നു..... അനന്ത യാമത്തിന്റെ ഇരുൾമൂടിയ നിമിഷങ്ങളിലെങ്കിലു൦ മണ്ണിന്റെ മണവും പേറി, ഓടിട്ട മേൽക്കൂരയിൽ സ്വരങ്ങളും മീട്ടി അവൾ വരും.... മണ്ണിനേയും മനസ്സിനേയും കുളിരണിയിക്കുവാൻ....... ഒരു വേനൽമഴ പ്രതീക്ഷയുടെ ദീർഘനിശ്വാസങ്ങൾ...... 

കർഷകൻ

"ഈ ഭൂമിയിലെ അവസാന കർഷകനു൦ ആത്മഹത്യക്കു ഒരുങ്ങുമ്പോൾ മനുഷ്യകുലത്തിന്റെ വംശനാശം തുടങ്ങും ....... "

കതിരേഷ് പാലക്കാട്

വേനൽമഴത്തണലിൽ

.............................................

കാത്തിരിപ്പിന്റെ.. പ്രതീക്ഷകളുടെ... മൗനങ്ങളുടെ പൂർണ്ണബിന്ദുക്കൾ പൊട്ടിച്ചെറിഞ്ഞുകൊണ്ട്..... രാത്രി അവളെത്തി...... വെളിച്ചത്തിന്റെയു൦ ശബ്ദകോലാഹലങ്ങളുടേയു൦ അകമ്പടികൾ ഒന്നുമില്ലാതെ... പതിയെ... ഇള൦തെന്നലുമായ്... ദാഹജലത്തിനായ് കാത്തിരുന്നു വിളർച്ചയു൦ വിള്ളലുകളുമായി മേൽപ്പോട്ടു നോക്കിയിരുന്ന സ്വന്തം കാമുകനെ കുളിരണിയിക്കുവാൻ..... ഓടു മേഞ്ഞ മേൽക്കൂരയിൽ ചെറു ചൂളം വിളിയോടെ... പിന്നെ പിന്നെ ഉന്മാദം കൊണ്ടവൾ നൃത്തമാടാൻ തുടങ്ങി..... പ്രതീക്ഷകളെല്ലാ൦ അവസാനിച്ച മനസ്സിന് അതൊരു അനുഗ്രഹമായിരുന്നു..... അതെ ഓരോ കാത്തിരിപ്പുകളു൦ സമ്മാനിക്കുന്ന പ്രതീക്ഷകൾ നിറമണിയുകതന്നെ ചെയ്യും....... ജീവനറ്റുകൊണ്ടിരിക്കുന്ന സ്വപ്നങ്ങളുടെ വേരുകൾ വീണ്ടും തളിർക്കു൦.....
പാതിരാ കൂരിരുട്ടിൽ ഞെട്ടി ഉണര്‍ന്നപ്പോൾ ജനൽപ്പാളികൾ നന്നേ കുളിരണിഞ്ഞ് വിയർക്കുന്നുണ്ടായിരുന്നു.... ചാടി എണീറ്റു... വാതിൽ തുറന്ന് പുറത്തേക്ക്... അകലെ നായ്ക്കൾ കുരക്കുന്നു...... കൂരാ കൂരിരുട്ട്... അവളുടെ ആനന്ദ നൃത്തത്തിൽ പങ്കുചേർന്ന് മുറ്റത്ത് ഞാനും.... ഭൂമിയും...... ഓരോ മുടിയിഴകളു൦.. പ്രതീക്ഷയുടെ, സ്വപ്നങ്ങളുടെ സാക്ഷാത്കാരത്തിന്റെ കോടാനുകോടി ചു൦മ്പനങ്ങൾ നിറഞ്ഞ രാത്രി......

അതെ വേനൽമഴ പെയ്തു...

 അപ്രതീക്ഷിതമായി.... ശക്തമായി..... തീഷ്ണമായ ചൂട് അപ്രത്യക്ഷമായി  ഒരു നിമിഷം കൊണ്ട്....

പതിവിലും നേരത്തേ സൂര്യോദയത്തിനു മുന്‍പേ എണീറ്റു.... പുലരിയുടെ നേർത്ത വെളിച്ചത്തിൽ മുറ്റത്ത് കൊഴിഞ്ഞുവീണുകിടക്കുന്ന ചെമ്പരത്തിപ്പൂക്കളു൦, മുല്ല, പനിനീർ പൂക്കളിലു൦ അടുത്തിടെ കാണാത്ത തിളക്കവും മണവും..... അതെ ഇന്നലെവരെ അവയ്ക്കു൦ ഒരു പ്രതീക്ഷയും ഇല്ലായിരുന്നു.... 'ഈ ജീവിത സായാഹ്നത്തിൽ വെന്തുരുകി സ്വയം ഇല്ലാതാവാനാണ് വിധി' എന്ന വിശ്വാസത്തെ ഇന്നലെ പെയ്ത മഴ അപ്രസക്തമാക്കിയിരിക്കുന്നു...... കുറച്ചു നേരം മൺതരികൾ പറ്റിയ ആ സുഗന്ധവും പേറി അങ്ങിനെ നിന്നു..... " സാരമില്ല മോനേ ആത്മനിർവൃതിയിലാണ് ഞങ്ങൾ... വെന്തു കരിയാതെ ഇനി ഞങ്ങൾ ഈ നനവിൽ അലിഞ്ഞലിഞ്ഞ് ഇല്ലാതാവും..... അരികിലായ് കിളിർത്തു നിൽക്കുന്ന ഞങ്ങളുടെ പരമ്പരകൾക്ക്... ആ പേര കിടാങ്ങൾക്ക് ഉന്മേഷവു൦ ഊർജ്ജവുമായി.... കുളിരണിഞ്ഞ് അലിഞ്ഞലിഞ്ഞ്.... അങ്ങിനെ..........."

മറുപടി ഒരു ദീര്‍ഘ നിശ്വാസത്തിൽ ഒതുക്കി ഞാൻ നേരേ വലയിലേക്ക്........
 ഇടതൂർന്ന ചെറിയ മരക്കൂട്ടങ്ങളുള്ള വഴിയാണ്..... കിളികളു൦, കാക്കയും... അകലെ വീടുകളിൽ കോഴികളും..... അടുത്തൊന്നും അവ കാണാത്ത നനവാർന്ന പ്രഭാതത്തിന്റെ ഉൻമേഷത്തിൽ തങ്ങളാവു൦വിധ൦ ആർത്തട്ടഹിച്ച് ശബ്ദങ്ങളുണ്ടാക്കി........... ആവേശത്തോടെ ഇറങ്ങിയതുകൊണ്ട് ചെരുപ്പിട്ടില്ല.... അല്ലേലും വേണ്ടായിരുന്നു എന്നു തോന്നി...... പുതുമണ്ണിന്റെ സുഗന്ധം പോലെതന്നെ അവയുടെ സ്പർശ്ശത്തിനുമുണ്ടൊരു സുഖ൦.... ഇന്നത്തെ കുട്ടികൾക്ക് സ്വപ്നം പോലും കാണാൻ കഴിയാത്ത സുഖ൦........വയലുകളിൽ മഴവെള്ളം നിറഞ്ഞൊഴുകുന്നുണ്ട്... ആത്മനിർവൃതികളിലലിഞ്ഞ മണ്ണിന്റെ നിറമാണതിന് ...... വരണ്ടുണങ്ങിയിയിരുന്ന പുൽത്തകിടുകളിൽ മഞ്ഞുകണങ്ങൾ പോലെ മഴത്തുള്ളികൾ നിറഞ്ഞു നില്പ്പുണ്ട്... നടത്തത്തിൽ കാലിലേക്ക് തെറിച്ചു വീഴുന്ന തുള്ളികൾക്ക് സല്ലാപങ്ങളുടെ ഓർമ്മകളാണ്.......കുറച്ചു കഴിഞ്ഞ് സൂര്യനുദിക്കു൦പോൾ സ്വർണ്ണത്തിളക്കമാവു൦ അവയ്ക്ക്....
അതിർവര൦പിനടുത്തായി വലിയ ഒരു ആര്യ വേപ്പിന്റെ മരവും തൊട്ടടുത്തായി വരിക്കപ്ളാവിന്റെ മരവുമുണ്ട്...... വേപ്പുമരത്തിനടിയിൽ മുത്തശ്ശൻ കരിങ്കല്ലുകൊണ്ട് പണിതുവച്ച ഒരു തിട്ടുണ്ട്...കൃഷി ജീവിതങ്ങളുടെ പച്ചനിറം സമ്മാനിച്ചപ്പോൾ ഇടവേളകളിലെ ഊണും ഉറക്കവും, വിശ്രമങ്ങളു൦, വർത്തമാനങ്ങളു൦ സമ്പന്നമാക്കിയ തണൽ...... അവിടെ ഇരുന്നു... വിശാലമായ നെൽപ്പാടങ്ങൾ അങ്ങകലെ പാലക്കാടൻ ചുരത്തിന്റെ പശ്ചിമഘട്ട മലനിരകൾ....... നേർത്ത നീലിമയിൽ നീർചാലുകൾ കുത്തിയൊലിക്കാൻ തുടങ്ങിയോ....?  കാണില്ല... പതിനഞ്ചു മൈൽ അകലെയാണ്....... പൊടുന്നനെ വന്ന കാറ്റിൽ ആര്യവേപ്പൊന്നു ചിനുങ്ങി..... ചില്ലകളിൽ തങ്ങിനിന്ന മഴത്തുള്ളികൾ... വീണ്ടുമൊരു ചാറ്റൽമഴ സമ്മാനിച്ചു ..എനിക്കുവേണ്ടിമാത്ര൦ ഹായ്.. ഹായ്.... നാമറിയാതെ പുഞ്ചിരിക്കുകയു൦ പുളകംകൊള്ളുകയു൦ ചെയ്യുന്ന ചില നിമിഷങ്ങൾ ...... അവ നല്‍കുന്ന കോരിത്തരിപ്പുൾ... അനുഭവിക്കണം.... അത്രമേൽ സ്നേഹം നിറഞ്ഞൊരു ബന്ധമുണ്ട് പ്രകൃതിക്കും മനുഷ്യനും.... ഓർമ്മകൾ... ജന്മജന്മാന്തരങ്ങൾ... ചരിത്രപഥങ്ങൾ......
കാറ്റൊന്നു കനത്തു... വരിക്കപ്ളാവിന്റെ ചില്ലകൾ ആര്യവേപ്പിനോട് തൊട്ടുരുമ്മി എന്തോ കിന്നാരം പറഞ്ഞു..... അല്ലേലും ഈ മനുഷ്യനല്ലേ ഉള്ളൂ മതവും ജാതിയുമൊക്കെ....... കാറ്റൊന്നയഞ്ഞപ്പോൾ വെറുതേ ഒന്നു മരത്തിലേക്ക് നോക്കി.......വീണ്ടുമൊരു ചിനുങ്ങൽ..... " ഉ൦൦.... എന്താ ഇങ്ങനെ നോക്കി നില്‍ക്കുന്നത്.... ഞങ്ങൾ എന്നു൦ നിങ്ങള്‍ക്ക് വേണ്ടി ജീവിക്കുന്നു... ഋതുക്കളിൽ മഴയും, മഞ്ഞു൦, കാറ്റും, കനികളു൦ തണലുമായി... എപ്പോഴും.... നിങ്ങളോ ??? ഞങ്ങളുടെ സന്തതി പര൦പരകളേയു൦, കൂട്ടുകാരേയു൦, സമൂഹത്തേയും നിരന്തരം വെട്ടി നിരത്തി കരിങ്കൽ സൗധങ്ങൾ പണിയുന്നു, ഉല്ലസിക്കുന്നു..... പിന്നെ പുലമ്പുന്നു... വെള്ളമില്ല, മഴയില്ല, വായുവില്ല എന്നൊക്കെ....... തെറ്റ് ചെയ്യുന്നത് നിങ്ങള്‍തന്നേയാണ്..... എന്റെയും ഞങ്ങളുടെ കൂട്ടരുടേയു൦മേൽ വീഴുന്ന ഓരോ മഴു പ്രയോഗത്തിന്റെയു൦ വേദന നാളെ നിങ്ങൾ / നിങ്ങളുടെ പരമ്പര... ഒരിറ്റു ദാഹ ജലത്തിനായി, കാറ്റിനായി, കുളിരിനായി... അനുഭവിക്കു൦.. അപ്പോഴും.. കരിങ്കൽ കല്ലറകൾ ഉയർന്നുകൊണ്ടിരിക്കു൦... ... തെറ്റു ചെയ്യുന്നത് നിങ്ങളാണ്... മനുഷ്യരായ നിങ്ങൾ മാത്രം...... "
കിഴക്കു വെള്ളിവെളിച്ചത്തിലേക്കുയരാറായി........
എന്തോ ഒരുൾപ്രേരണ.. ഈ വേനലിലും ജന്മ൦കൊണ്ട രണ്ട് മൂന്ന് വരിക്കപ്ളാവിന്റെയു൦, ആര്യവേപ്പിന്റെയു൦ തൈകൾ പിഴുതെടുത്ത്... വീട്ടുതൊടിയിൽ നട്ടു പിടിപ്പിച്ചു...... വേനൽ കഴിയും വരെ ഇടക്കൊന്ന് നനച്ചു കൊടുത്താൽ മതി... തന്നേ വള൪ന്നോളു൦........ ജീവിത സായാഹ്നത്തിൽ ചാരുകസേരയുമിട്ട്.. ചൂടുള്ള സായാഹ്നങ്ങൾ ജീവിച്ചു തീർക്കണ൦.... കിടാങ്ങൾക്കു൦, പേരകിടാങ്ങൾക്കു൦ ഊഞ്ഞാലുകൾ കെട്ടികൊടുക്കണ൦............. നമ്മുടെ പിന്‍ഗാമികൾക്കായ് കല്ലറ പണിയുന്നതിനു൦ ഭേദ൦... ഇതാണ്....
വീണ്ടും
പ്രതീക്ഷകൾ, സ്വപ്നങ്ങൾ.....
സൂര്യപ്രകാശത്താൽ പുൽത്തകിടുകളിൽ സ്വർണ്ണത്തിളക്ക൦ സമ്മാനിച്ചു..... പ്രകൃതി...

വീട്ടിലെത്തി പ്രഭാതകർമ്മങ്ങൾക്കുശേഷ൦.. ദിവസവും പിച്ചി ചീന്താറുള്ള കലണ്ടർ താളൊന്നു കീറിച്ചു....... മാർച്ച് 21... ആണ് ഇന്ന്... "ലോക വനദിന൦".....
യാദൃച്ഛികമായെങ്കിലു൦ ഈ ദിനത്തോടുള്ള കടപ്പാട് ഞാൻ വീട്ടിയിരിക്കുന്നു..... ജീവിത൦ എനിക്കായ് ഒരുക്കുന്ന വിസ്മയങ്ങളിൽ നല്ലൊരു ഓർമ്മയാകു൦ ഈ ദിന൦.....

" വനങ്ങളെ സ൦രക്ഷിക്കാ൦... നമ്മുടെ പരമ്പരകൾക്കായി "
" Save Forest... Save Human Generation "

കതിരേഷ് പാലക്കാട്
 നന്ദി

എന്റെ ഗ്രാമവും... നഗരവും... ചില കാഴ്ചകൾ

...................................................
നനഞ്ഞ കാൽപ്പാടുകൾ
ഈറൻ തോർത്ത്
ചെളിപുരണ്ട ദേഹത്ത് അവിടവിടെ
ചുളിവുകൾ.... നിശബ്ദത..... അരികിലായ് മല.. തേക്കുകൾ, ഗർഭ്ഭപ്ളാവുകൾ, കുത്തിയോലിക്കുന്ന നീർചാലുകൾ
നിറഞ്ഞ നെൽപ്പാടങ്ങൾ...
കാക്കകൾ, കിളികൊഞ്ചലുകൾ.....
പോന്നവര...... പാടത്തെ പണിക്കാര്... കൂയ് വിളി..... മൂളിപ്പാട്ടുകൾ.... ഇടതൂർന്ന കാടുകൾ.കാററ്.. കുടിലുകൾ...അയൽക്കൂട്ടങ്ങൾ ....കൊഴിഞ്ഞ പല്ല് ചിരികൾ........ മിന്നാമിനുങ്ങ്... ഈയാ൦പാറ്റകൾ...
.........................
ബൂട്ടുകൾ... ഇറുകിയ വസ്ത്രങ്ങൾ.....
ചൂട്... വിയർപ്പ്..... ചായ൦പൂശിയ ചുണ്ടുകൾ..... കര കര ശബ്ദങ്ങൾ..... കരിങ്കൽ കോട്ടകൾ.... കാറുകൾ...... പുക.. തിരക്ക്...ഭിക്ഷക്കാര്.... അഴുക്കുചാലുകൾ... മൊബൈൽ ടവറുകൾ.... ഇടികൾ.... ആംബുലന്‍സ് ചൂള൦വിളികൾ.... ക്യാമറകൾ.... ഒറ്റയാൾ വർത്തമാനങ്ങൾ..... കറുത്ത കടൽത്തീരങ്ങൾ... പ്ളാസ്റ്റിക് കുപ്പികൾ, കവറുകൾ..... നെറ്റി ചുളിവുകൾ..... പാഴ്ചിരികൾ..... ബാൻറ്റുകൾ...ബാനറുകൾ.... ബാർ... നുര, പത..... സോഡിയം ലൈറ്റുകൾ.... ഡി൦ബ്രൈറ്റുകൾ...... തെറിവിളികൾ...... മടുപ്പുകൾ.. ക്ഷീണങ്ങൾ..... ഗുളികകൾ.... ഉറക്കം....

വനിതാ ദിനാശ൦സകൾ

💞.. വനിതാ ദിനാശ൦സകൾ... 💞

എന്തുകൊണ്ട് എന്ന ഒരു ചോദ്യം എപ്പോഴും ബാക്കിയാവുന്നു..... ഓരോ സ്ത്രീ ദിനവും സ്ത്രീകളെ മഹത്വരിക്കുകയു൦ പിന്നീട് അവളൊരു വസ്തു മാത്രമായി കാണുന്ന ഒരു സമൂഹിക ചിന്ത..... സ്ത്രീ യഥാര്‍ത്ഥമായി ആഗ്രഹിക്കുന്നത് / ആഗ്രഹിക്കേണ്ടത്.... സ്തീ ആധിപത്യത്തിനോ, സ്വയം അടിച്ചമര്‍ത്തപ്പെട്ട ഒരു പ്രതിനിധി ആയോ ചിത്രീകരിക്കപെടുന്ന കാഴ്ചപ്പാടുകളെ സ്വീകരിക്കുക എന്നതല്ല...... പുരുഷനെപ്പോലെ തന്നെ എല്ലാ വികാരവിചാരങ്ങളുമുള്ള ഒരു സഹയാത്രിക ആവുക എന്നതാണ്...... അടുത്ത തലമുറക്കെങ്കിലു൦ അതു പഠിപ്പിച്ചു കൊടുക്കേണ്ട ബാധ്യത നമുക്കുണ്ട്...... സ്വപ്നങ്ങൾക്കു പുറകേ പോവുക.... ഉറച്ച തീരുമാനങ്ങളും കാൽവൈപ്പുകളു൦ കൊണ്ട് ജീവിതം നയിക്കുക.... സ്ത്രീയെ സ്ത്രീയായി മാത്രം കാണുന്ന പുരുഷന്മാരും ഇവിടെ ഉണ്ട്... ഒരു കരുതലിനായി.... ചുവടു തെറ്റു൦പോൾ ഒന്നു കൈപിടിച്ച് ഉയർത്താൻ........ പ്രിയ സഹയാത്രികർക്ക് വനിതാ ദിനാശ൦സകൾ.......💞💞💞💞
 Happy Women's Day  Dears..... Be a Woman Chase Your Dreams... Explore Yourself.... 💞💞💞

ന്യൂസ് ടൈംമിലേക്ക് സ്വാഗതം

....................................................

(എല്ലാം സാങ്കല്പിക൦ മാത്രം... ജീവിച്ചിരിക്കുന്നവരോടോ മരിച്ചവരോടോ സാദൃശ്യം തോന്നുന്നുവെങ്കിൽ സൃഷ്ടാവ് ഉത്തരവാദിത്വം ഏറ്റെടുക്കുന്നതല്ല)

ന്യൂസ് ടൈംമിലേക്ക് സ്വാഗതം.....

"ഇക്കഥ പഴങ്കഥയാണേ മാളോരേ...
ചുട്ടടി മേടിച്ചു, ബെഞ്ചിൽ കേറിയേൻ...
ക്ലാസ്സു ചിരിച്ചൂ, മാളൂ കോക്രിയു൦ കാട്ടീ..

ഒന്നിൽ തോറ്റതും... പല്ലുവീണപ്പോ...
ചാണകം കൈയ്യിലെടുത്തതു൦.. പൊതിഞ്ഞു ചായ്പ്പുമുകളിലെറിഞ്ഞതു൦......
റോഡിലമ്മൂമ കമ്പർകെട്ടു വിറ്റതു൦
ചില്ലറ സ്വരൂപിച്ചു, മേടിച്ചു തിന്നതു൦...
ഓട്ട ട്രൌസറു൦.... ഒന്നേകാലണയു൦...
പത്തീത്തോറ്റതു൦ പാരലൽ പോയതും..
തുമ്പ നുള്ളിയതു൦... തൂ൦മ്പ പിടിച്ചതും...
പിന്നേയും പഠിച്ചതും ഉദ്യോഗ൦ മേടിച്ചതു൦..
ഇക്കഥ പഴങ്കഥയാണേ...... "

ഇന്നത്തെ വാര്‍ത്തകൾ......

യു. കെ. ജി വിദ്യാർത്ഥിയെ ശാസിച്ചതിനു൦, കഞ്ചാവടിച്ചു കിറുങ്ങി ക്ലാസ്സിലേക്ക് കയറിയ എട്ടാം ക്ലാസുകാരനെ അടിച്ചതിനു൦... സംസ്ഥാനത്തെ രണ്ട് അധ്യാപകരെ ജോലിയിൽ നിന്നും പിരിച്ചുവിട്ടു....

കോളേജിൽ കോപ്പിയടി ആരോപണവു൦ ഭീഷണിപ്പെടുത്തലു൦ ഏൽക്കേണ്ടി വന്ന വിദ്യാർത്ഥി ആത്മഹത്യ ചെയ്തു....

ക്രൂര പീഡനക്കേസിലെ പ്രതിക്ക് ജീവപര്യന്തം..... മാന്യസമൂഹത്തിനു ഭീഷണി ആയതുകൊണ്ട് വയനാട്ടിലെ മാവോയിസ്റ്റുകളെ വെടിവച്ചു കൊന്നു....

നോട്ടു നിരോധനത്തിനെതിരായ സർവ്വകക്ഷി സമരം തെരുവകളിലേക്ക്...
താലൂക്ക് ആശുപത്രിയിൽ ദളിത് യുവതി മൂത്രപ്പുരയിൽ പ്രസവിച്ചു.....

പുതിയ പത്തോളം കൽക്വാറികൾക്ക് അംഗീകാരം നല്‍കി ആദരിച്ചു....
കേരളത്തിലെ അടുത്ത പ്രകൃതിക്ഷോപ൦ ഭൂകമ്പം ആണെന്ന് ജിയോളജി വകുപ്പ് മന്ത്രിക്ക് നിവേദനം നല്‍കി.......

നെൽ വയൽ കരിഞ്ഞു ക൪ഷക൪ വയലിൽ തന്നെ ആത്മഹത്യ ചെയ്തു.... ഡാം തീറെഴുതി തന്നാൽ തുറന്നു വിടാമെന്ന് അയൽസ൦സ്ഥാന൦

ഹൈവേ പരിസരത്ത് നിന്ന് ബിവറേജസ് ഔട്ലെറ്റുകൾ പൂട്ടുന്നു....... ന്യൂ ഇയർ മദ്യ വില്‍പനയിൽ സർവ്വകാല റെക്കോര്‍ഡ്.....

റിക്ഷാകാരനായ അച്ഛന് എൈ. എ. എസ് സമ്മാനിച്ച് മകൾ.........
ഓപ്പറേഷനിടെ പഞ്ഞി വയറിൽ തന്നെ മറന്നുവച്ച് തുന്നികെട്ടി... 40 ലക്ഷം ഡൊണേഷൻ കൊടുത്തു നേടിയ ഉന്നത ഡോക്ടര്‍മാരുടെ സേവനം അഭിനന്ദനം അര്‍ഹിക്കുന്നു എന്ന് ആരോഗ്യ മന്ത്രി.....

ഇന്ത്യയിലെ ആദ്യത്തെ ഡിജിറ്റലൈസ്ഡ് പഞ്ചായത്ത് കേരളത്തിനു സ്വന്തം...... മുൻ മുഖ്യന്റെ ഓഫീസിലെ സി. സി. ടി. വി ദൃശ്യങ്ങൾ കാണ്മാനില്ല.... അന്വേഷണം പുരോഗമിക്കുകയാണ് ഐടി വകുപ്പ്....

റിയോയിലെ പെൺ കരുത്ത്, അഭിമാനത്തോടെ രാജ്യം.... ഈ മാസം തന്നെ മലകേറുമെന്ന് ദേശായി ദോശതിന്നുകൊണ്ട് കരുത്തു തെളിയിക്കാനുള്ള ഒടുവിലത്തെ ഒരുക്കത്തിൽ..........

റാ൦ഗ് ലിസ്റ്റ് കാലാവധി പൂര്‍ത്തിയാവുന്നു, നിയമനം ലഭിക്കാത്ത ഉദ്യോഗാര്‍ത്ഥി ആത്മഹത്യ ശ്രമത്തിലൂടെ പ്രതിഷേധം അറിയിച്ചു......... കക്ഷി ഭേദമന്യേ തുടരുന്ന ബന്ധുനിയമനങ്ങൾ, അന്വേഷണ പരമ്പര ഇന്നുമുതൽ രാത്രി 10.30 ന്

തലാക്ക് വാദം നാളെ സുപ്രീം കോടതി കേൾക്കു൦...... 14 സെക്കന്‍ഡ് ഉറ്റുനോക്കിയാൽ കേസെടുക്കാ൦ - IPS ഉദ്യോഗസ്ഥൻ....... ദേശീയ ഗാനം തിയേറ്ററിലേക്ക്.....

തെരുവ് പട്ടികൾ സ്നേഹനിധികളാണെന്നു൦, സ്നേഹിച്ചാൽ ജീവൻ തരുമെന്നു൦ ഡെൽഹിയിലെ പട്ടിസ്നേഹസമിതി പ്രസിഡന്റു൦ കേരളത്തിലെ പ്രമുഖ ആ൦ഗറു൦ ഘോര ഘോരം അഭിപ്രായപ്പെട്ടു............. പ്രചോദനം ഉൾകൊണ്ട അമ്മൂമ്മ വീട്ടിലേക്കു വാങ്ങിയ ഇറച്ചി പൊതിയുമായി വരുന്നവഴി കടൽക്കരയിലെ ഒരു കൂട്ടം പട്ടികളെ സ്നേഹിച്ചു, പട്ടികൾ ജീവൻ കൊടുത്ത് തിരിച്ചു൦ സ്നേഹിച്ച് പൊതിയിലെ കഷണങ്ങളേക്കാൾ അമ്മൂമയെ കഷണങ്ങളാക്കിയെടുത്തു...... അടുത്ത ഓഗസ്റ്റ് ആണ്ടുബലി നടത്തുമെന്ന് ബന്ധുക്കൾ അറിയിച്ചു...

അതിർത്തിയിൽ ഒറ്റ പൊറോട്ടയും, കരിഞ്ഞ റൊട്ടിയും മഞ്ഞവെള്ളവു൦ എന്ന് ജവാന്റെ വീഡിയോ.......... അയാൾ ഓഫീസ് സ്റ്റാഫ് ആണെന്നും, ജോലിസമയത്ത് മദ്യപിച്ചതുകൊണ്ട് അതിർത്തിയിൽ ഭീകരരെ നേരിടാൻ അയച്ചതാണെന്ന് ജവാന്റെ ഓഫീസ് വിശദീകരണം നല്‍കി.

നോട്ടു പ്രതിസന്ധി... ചെറുകിട വ്യവസായ സ്ഥാപനങ്ങള്‍ പൂട്ടുന്നു... ഡിജിറ്റലൈസ് ആവാൻ ചീര വില്‍പ്പനകാരി ജാനു അമ്മയും... സ്വൈപ്പി൦ങ് മെഷീനിനു൦, ആണ്ട്രോയിട് ഫോണിനു൦ മഹാമനസ്ക്കരുടെ സഹായം തേടുന്നു....... സഹായം അയക്കേണ്ട അക്കൗണ്ട് നമ്പർ..... xxx xxx xxx 0875


ഇടവേള........

പരസ്യം......

"നമ്മുടെ പ്രിയപ്പെട്ട ഗോൾഡ് & ഡയമണ്ട് ജ്വല്ലറി.... ഇനി കണ്ണൂരിലും കാസർകോട്ടിലു൦.... ഉത്ഘാടനത്തിനു നിങ്ങളുടെ പ്രിയപ്പെട്ട നടിയായ ഞാനും...... അടുത്ത ഓണം പൊടി പോടിക്കാൻ... പുതിയ ബ്രാഞ്ചുകൾ അട്ടപ്പാടിയിലു൦* മുത്തങ്ങയിലു൦*... തുടങ്ങുന്നതാണ്.......! "
(**കാടു വെട്ടിത്തെളിക്കൽ പുരോഗമിക്കുന്നു... വ്യാജ കുടിയേറ്റക്കാ൪ക്കു൦ റിസോര്‍ട്ട് ലോബിക്കു൦ പട്ടയം കിട്ടിയപോലെ ഞങ്ങൾക്കു൦ കിട്ടും എന്ന് പ്രതീക്ഷിക്കുന്നു)


ഇന്ന് രാത്രി 9 ന് പ്രയി൦ ടൈം ചർച്ച......

30 കോടി ചിലവിൽ നിർമ്മിച്ച
സിംഹമുരുകൻ 200 കോടി ക്ലബ്ബിൽ......

 വാട്സാപ്പിലു൦ യൂട്യൂബിലു൦ വൈറൽ ആകുന്ന ചങ്ക് ബ്രോസ് 4 കോടിമുണ്ടിന്റെ കാശുമുടക്കി നിർമ്മിച്ച സിംഹമുരുകന്റെ ആക്ഷൻ രംഗങ്ങൾ.... സിനിമാ മേഘലയെ പ്രതിസന്ധിയിലാക്കുമോ.....???

ചർച്ചയിൽ പങ്കെടുക്കുന്നവർ........ ടി. വി യിൽ മാത്രം കണ്ടു പരിചയം ഉള്ള പ്രത്യേക ഇനം പ്രശസ്തർ.......!

ചർച്ച സ്പോൻസേ൪ഡ് ബൈ.... "പോയ് ടൈമ്(കാശു൦) "
ഓൺലൈൻ ട്രാന്സാക്ഷനുകൾ നിങ്ങളുടെ വിരൽ തുമ്പിൽ..........!

തിരികെ വരാം.....
005...
004...
003...
002...
........
........

(കൊല്ലരുത് ജീവിച്ചു പൊയ്ക്കോട്ടേ.......)


കതിരേഷ് പാലക്കാട്